Woote ɗen 2015 : « Feppeendi njuɓɓudi ndin hino wallina ɓernde »

0
149

Hunndukoojo (porte-parole) ngomnanke (officiel) on ka CENI, Me Aamadu Salif Kebe, hirjinii bensondiral maako jaaynirgal aranal ngal ñannde 05 Uksatu ka saare Kindiya. Ɗum ko e battane dental kumpital e heblo jaayndiyanke (Journalistes) en no woote ɗen yawtirta.

Me Aamadu Salif Kebe maandinno sawra (évolution) heblooji woote saatiiɗe ɗen Oktoombur aroowo. O holliti wonde CENI on muutike ka hebilanagol woote ɗen. Ko yahata 80 haa 85 % golleeji hebilaaɗi. Ko wano non kadi o holliri ko waɗi haa mahiindi (institution) makko ndin suɓii hunndukoojo ngomnanke. Ɗum Ko no hoynira feppeendi (niveau) jokkondiral nagl jonna jamaa on e gollodiiɓe ɓen kumpite CENI on. Ko e jurol CENI on woni ko jaayndiyanke en rewrata fii heɓugol kumpite yowondirɗe e woote ɗen.

E nder sagaraaji gollaaɗi ɗin, hunndukoojo CENI on anndinno wonde sagara ɗuuɗuɗo yawtaama. « Tippude e binɗi sariya ɗin ka CENI, men waawuno rewtaade doggi (listes) wootiri ɗin. Men tawi duttorɗe (données) ɗen ƴawii. En wii’ay tun men etike hikka fii daɗugol majjugol duttorɗe ɗen wano ko heɓunoo en kon ka rewtagol doggi woote yawtuɗe. Men etino yananeede ɓeydagol doggi ɗin. Meɗen jogitii sarworɗe (serveurs) e nder lowre (site) wi’eteende « site central » meɗen danndi (sauvegardé) duttorɗe limrejum ɗen (numériques) e nder lowre goo wi’eteende « site backup … », wano o joopiri non.

Nde o yewtaynoo fii ƴawugol « kit » ngol, o ɓanginno wonde nooneeji rewtorɗi « kit » ɗin fow hewtii Konaakiri, golle moftugol duttorɗe ɗen gasii. Ko wono non kadi, njuɓɓo AFIS ngon e senndito ngon gasii. « Ko e muulugol doggi wootirɗi kenenti ɗin wonaa..  yoweede majji on fuɗɗoto gila 08 Uksatu fii balɗe 15. Ɗen golle ko fii newingol saatugol doggi wootirɗi ɗin », no o jaggiri non. O jokkitori hollitugol ko ontuma woni ko laaɓanta fow e yowannde nden. «Tuma goɗɗo waɗtani yiila haa o haatawi yi’i mo haanaa wonde ka doggol wootirngol, himo waawi furñitude ɗum ka goomu (commission) maa o anndina ñaawoowo on fii no on neɗɗo hoosiree ton”, wano o ɓeydiri non. Tuma duttorɗe ɗen saataa, ko tafugol karte ɗen heddanntoo CENI on, senndita ɗum refti woote ɗen waɗa.

Ko yowitii e nafqugol woote hoorejo leydi ɗen, hunndokoojo CENI on anndintinno wonde gollodiiɓe (partenaires) ɓen hino wallitaade ka mahiinde (institution) makko. « ɗuuɗuɓe e gollodiiɓe amen ɓen feeñii, ko men ɓannginta tun fewndo hannde, newotaako haan kadi ka gollodiiɗo okkota CENI on “sek” (chèque). Gollodiiɓe ɓen fow hollitii ko mahiiɗi (institutions) e terɗe (organs) honɗe halfinaa kippugol happu (mandat) maɓɓe ngun. Ɗum holli, kala kaalisi hollitaaɗo fii mun wanaa e konti CENI on iwiri ».

O ɓeyditi : « kala tafooɓe moggitorɗe woote (isoloirs) faalaaɓe jebbilanaade Gine waɗay ɗaɓɓal mun ngal, urba waɗoyte e juuɗe halfinaaɓe kisnal kaalisi ɓen ka CENI. Si tafoowo ar ka ƴettaa, ko kanko jonnata moggirɗe woote ɗen halfinaaɓe kisnal kaalisi ɓen yoɓay kisan tafoowo on ».

O timminiri hollugol feppeendi njuɓɓundi ndin hino wallina ɓernde. « Men neɓtaaki hikka wano no woowiri non ».

Janngu ɗum e N’koo

 

LAISSER UN COMMENTAIRE

Please enter your comment!
Please enter your name here